சிவகங்கை மாவட்டம் காரைக்குடி புதுவயல், ஸ்ரீ வித்யா கிரி மெட்ரிகுலேஷன் மேல்நிலைப் பள்ளி விளையாட்டு மைதானத்தில் நடைபெற்று வரும் ‘ATC-cum IUC-RDC’ முகாமின் ஒரு பகுதியாக, ‘கர்த்தவ்யா பாத் அணிவகுப்பு’ (Kartavya Path Drill) மற்றும் ‘கௌரவ அணிவகுப்பு’க்கான (Guard of Honour) யூனிட்களுக்கு இடையேயான போட்டி இன்று நடைபெற்றது.
திருச்சி என்.சி.சி குரூப் தலைமையகத்தின் குரூப் கமாண்டர் கர்னல் கெளரவ் சிரோஹியை, காரைக்குடி 9 தமிழ்நாடு பிஎன் என்.சி.சியின் பொறுப்பு அதிகாரி லெப்டினன்ட் கர்னல் துர்கேஷ் உபாத்யாய் வரவேற்றார்.
திருச்சி என்.சி.சி குரூப் தலைமையகத்தின் கீழ் உள்ள ஒன்பது என்.சி.சி பிரிவுகளைச் சேர்ந்த மாணவ, மாணவிகள் (கேடட்கள்) மிகுந்த உற்சாகத்துடனும், ஒழுக்கத்துடனும், போட்டி மனப்பான்மையுடனும் இதில் கலந்துகொண்டனர்.
குடியரசு தின முகாமில் (RDC) பங்கேற்பதற்கான சிறந்த கேடட்களைத் தேர்ந்தெடுப்பதற்காகவும், மேலும் மாணவர்கள் தங்கள் அணிவகுப்புத் திறன், ஒழுக்கம், கூட்டு முயற்சி மற்றும் தன்னம்பிக்கையை வெளிப்படுத்துவதற்காகவும் இப்போட்டி அமைக்கப்பட்டது.
அணிவகுப்புப் போட்டிகளை முழுமையாகப் பார்வையிட்ட குரூப் கமாண்டர், பங்கேற்ற அனைத்துக் கேடட்களின் கடின உழைப்பையும், அர்ப்பணிப்பையும், அவர்களின் சிறந்த அணிவகுப்புத் திறனையும் பாராட்டி வாழ்த்தினார்.
மேலும், வரவிருக்கும் குடியரசு தின முகாம் நிகழ்வுகளுக்குத் தொடர்ந்து கவனத்துடன் தயாராகுமாறும், சிறந்து விளங்க பாடுபடுமாறும் கேடட்களை அவர் ஊக்குவித்தார்.
திருச்சி குரூப் தலைமையகத்தின் கீழ் பயிலும் என்.சி.சி கேடர்களின் உயர்நிலை ஒழுக்கம், அர்ப்பணிப்பு மற்றும் போட்டி மனப்பான்மையை இந்நிகழ்வு வெளிப்படுத்தியது.
ஜெய்ஹிந்த்
செய்தி& படங்கள்
சாய் தர்மராஜ்
