கொல்கத்தாவின் வடக்குபகுதியான சாரதா பார்க் துர்கா பூஜை பந்தலில் சனிக்கிழமை இரவு ஏற்பட்ட பயங்கர கூட்ட நெரிசலில் சிக்கி இதுவரை 17 பேர் பஉயிரிழந்துள்ளனர். மேலும் 35-க்கும் மேற்பட்டோர் படுகாயமடைந்து தீவிர சிகிச்சை பெற்று வருகின்றனர்.
இரவு 7.40 மணியளவில் பந்தலில் ஆயிரக்கணக்கான பக்தர்கள் திரண்டிருந்த நிலையில் திடீரென பலத்த மழை பெய்யத் தொடங்கியுள்ளது. இதனால் வெளியே நின்றிருந்த மக்கள் அனைவரும் ஒரே நேரத்தில் பந்தலுக்குள் நுழைய முயன்றதால் நுழைவு மற்றும் வெளியேறும் வாயில்களில் கடுமையான நெரிசல் ஏற்பட்டது. இதில் பலர் கீழே விழுந்து மிதிபட்டு மயக்கமடைந்தனர். பாதிக்கப்பட்டவர்களை உடனடியாக மீட்ட பொதுமக்கள், ஆம்புலன்ஸ் வருகைக்காகக் காத்திருக்காமல் இருசக்கர வாகனங்களிலேயே மருத்துவமனைக்கு விரைந்து தூக்கிச் சென்றனர்.
காயமடைந்த அனைவரும் மீட்கப்பட்டு கொல்கத்தா மருத்துவக் கல்லூரி மருத்துவமனையில் சிகிச்சைக்காக அனுமதிக்கப்பட்டுள்ளனர். இதில் 17 பேர் உயிரிழந்துள்ளதாக முதற்கட்ட தகவல்கள் தெரிவிக்கின்றன. இச்சம்பவத்தைக் கேள்விப்பட்டதும் முதல்வர் சுவேந்து அதிகாரி, தலைமைச் செயலாளர் மனோஜ் அகர்வால் மற்றும் சுகாதாரத் துறை அமைச்சர் சர்வாத் முகர்ஜி ஆகியோர் நேரடியாக மருத்துவமனைக்குச் சென்று பாதிக்கப்பட்டவர்களுக்கு அளிக்கப்படும் சிகிச்சைகளை நேரில் பார்வையிட்டனர்.
சம்பவ இடத்தில் தீயணைப்புத் துறை, பேரிடர் மீட்புக் குழு மற்றும் மருத்துவக் குழுவினர் தீவிர மீட்புப் பணிகளில் ஈடுபட்டதைத் தொடர்ந்து, பொதுமக்களின் பாதுகாப்பு கருதி அந்த பூஜை பந்தல் உடனடியாக மூடப்பட்டது. மேலும், பொதுமக்கள் தகவல்களைப் பெறுவதற்காக லால்பஜார் கட்டுப்பாட்டு அறையில் அவசர உதவி எண்களும் அறிவிக்கப்பட்டுள்ளன.
